திருவள்ளுவர் நாத்திகராக இருக்க வாய்ப்பே இல்லை: ‘ஆய்வாளர்’ மாஃபா பாண்டியராஜன்

திருவள்ளுவருக்கு காவி உடையணிவித்து சமூக ஊடகங்களில் பாஜகவினர் பரப்பினர். இது கண்டனத்தை கிளப்பிய நிலையில், ‘திருவள்ளுவர் நாத்திகரா?’ என்கிற சர்ச்சை கிளம்பியது.

பாஜகவின் எச். ராஜா, நாராயணன் போன்றோர் அவரை ஆத்திகர் எனக் கொண்டாடிய நிலையில், தமிழக அமைச்சர் மஃபா பாண்டியராஜன், ‘திருவள்ளுவர் நாத்திகராக இருக்க வாய்ப்பேயில்லை என தனது ட்விட்டர் பதிவில் தெரிவித்துள்ளார்.

பாஜகவின் சில காலம் இருந்த பாண்டியராஜன், அதிமுகவில் பாஜகவின் பி டீமாக செயல்படுவதாக விமர்சனங்கள் வைக்கப்படும் நிலையில் அவர் இவ்வாறு தெரிவித்துள்ளார்.

’நாத்திகர்’ என தமிழ் மரபில் குறிப்பிடப்படுவதற்கு பொருள், பார்ப்பன எதிர்ப்பு மரபில் வந்தவர் என்பதே என பலர் சுட்டிக்காட்டியுள்ளனர்.

”திருவள்ளுவரை நாத்திகர் என்று எவருமே கூறாதபோது இவருக்கு ஏன் ஆத்திரம்? வேத மறுப்பு என்பது வேத காலத்திலேயே தோன்றியதாகும். எடுத்துக்காட்டு: சாருவாகம். தசரதனுடைய அவையில் இருந்த ஜாபாலியைப் பற்றி வால்மீகி ராமாயணம் கூறுகிறது. வேத மறுப்பாளர்களையும் அவை சொரிந்து (விலங்குகளைப் பலியிட்டு) நடத்தப்பட்ட வேள்விகளை எதிர்ப்பவர்களைக் கொன்று குவிக்க இராமனைத் தன்னுடன் காட்டுக்கு அனுப்ப வேண்டுமென்று தசரதனிடம் விசுவாமித்திரன் கேட்டதாகவும் இராமாயணத்தில் உள்ளது. எதிர்த்தோருக்கு அசுர முத்திரை.

அப்படியாயின், அவிசொரிந்து ஆயிரம் வேட்டலை எதிர்த்த வள்ளுவர் வேதநெறிப்பட்டவரா? வேதநெறி எதிர்ப்பாளரா? அவர்கள் பார்வையில் வள்ளுவரும் அசுரரே! போகட்டும்! வள்ளுவர் கூறியதாகக் கூறப்படும் வாலறிவன், வேண்டுதல் வேண்டாமை இலான், பொறிவாயில் ஐந்தவித்தான், அறவாழி அந்தணன் (பிதாமணன் அல்லன்) என்னும் இலக்கணத்துக்குட்பட்ட இந்து மதக் கடவுள் ஒன்றையாவது (ஒருவரையாவது) சங்கிகளாலும் சங்கிகளின் அடிதாங்கிகளாலும் காட்டமுடியுமா?” என முத்துசெல்வம் என்பவர் முகநூலில் பாண்டியராஜனின் கருத்துக்கு பதில் கேள்வி எழுப்பியுள்ளார்.

மனநல மருத்துவர் ஷாலினி தனது முகநூலில்

“திருவள்ளுவர் நாத்திகராக இருக்க முடியாதாம்… ஹலோ நாத்தீகம்னா என்னனு தெரிஞ்சிகிட்டு பேசுங்க.

நாத்திகம் என்றால் வேத மறுப்பு, தட் மீன்ஸ், பிறப்பால் உயர்வு தாழ்வு, ஜாதி, privilege, entitlement, Supremacy மாதிரியான அம்சங்களை ஏற்காதவர் என்று அர்த்தம். நான்கு வர்ண அடுக்கு நிலையை நிராகரித்தவர் என்று அர்த்தம்.

எட்டாம் நூற்றாண்டின் classification படி ஆதிக்க மதங்கள்: சைவம், சாக்தம், கௌமாரம், காணாபத்யம், சௌரம், வைணவம். இவை எல்லாமே சதுர் வர்ணமெனும் racist கோட்பாட்டை ஏற்றவை.

அதே கிளாஸிபிகேஷன் படி நாத்தீக மதங்கள்: லோகாயதா, ஆசீவகம், பௌத்தம், ஜெய்னம். இவை எல்லாவற்றுக்குமான பொது அம்சம்: வேதம் விட்ட கப்ஸாவை நம்பாமல் சொந்த அறிவை பயன்படுத்தியவர்கள். இதில் ஜயினர்கள் பிறவி, மறுப்பிறவி, மாதிரியான கருத்துக்களை வைத்திருந்ததால் அவர்கள் கொஞ்சம் வைதீகத்தோடு ஒத்துப்போனார்கள்.

ஆனால் ஆசீவர்கள் ஒரு போதும் ஒத்து போகவேயில்லை. ஆதி தமிழரது மதம் ஆசீவகம். திருவள்ளுவர் ஆசீவக மதத்தை சேர்ந்தவராக இருக்கக்கூடும்.  ஆசீவகர்களை சமணர் என்று அழைப்பர்.  இவர்கள் தத்துவம், வானியல், மருத்துவம் ஆகியவற்றில் ஜித்தர்கள். ஜித்து=சித்து. திருநாவுக்கரசருக்கு சூளை நோய்க்கு அறுவை சிகிச்சை செய்தவர் ஆசீவக துறவியர். இந்த துறவியரை தான் பிறகு சைவர்கள் கழுவில் ஏற்றி கொன்றார்கள். இவர்கள் தீவிர வேத எதிர்ப்பாளர்கள், அதனால் நார்த்தீகர்கள்!!

பிறப்பொக்கும் எல்லா உயிர்க்கும் vs சதுர்வர்ணம் மயா சிருஷ்ட்டம்.

நீங்கள் எந்த பக்கம்?” என கேள்வி எழுப்பியுள்ளார்.

ஊடகங்களை மிரட்டும் காவிக் கும்பல்: ‘குரல்’ பத்திரிகையாளர் அமைப்பு கண்டனம்

புதிய தலைமுறை தொலைக்காட்சியின் நெறியாளர் கார்த்திகேயனை பாஜகவினர் சமூக ஊடகங்களில் மிரட்டி வருவது கண்டிக்கத்தக்கது என ‘குரல்’ பத்திரிகையாளர் அமைப்பு தெரிவித்துள்ளது. இதுகுறித்து அவ்வமைப்பு வெளியிட்டுள்ள அறிக்கையில்,

“’மாதவிடாய் காலத்தில் பெண் தெய்வங்கள் கோயிலை விட்டு வெளியேறிவிடுகின்றனவா?’ – என பொருள்படும் கவிதையை நிகழ்ச்சி ஒன்றில் மேற்கோள் காட்டியதற்காக, புதிய தலைமுறை தொலைக்காட்சி நெறியாளர் கார்த்திகேயன், பா.ஜ.க., இந்து முன்னணி மதவாத கும்பலால் மிக வெளிப்படையாக மிரட்டப்பட்டு வருகிறார். கார்த்திகேயன் சொன்ன வார்த்தைகளில் எவ்வித தவறும் இல்லை எனினும், அவர் அதற்காக தனது ஃபேஸ்புக் பக்கத்தில் வருத்தம் தெரிவித்திருக்கிறார். இருந்தபோதிலும், ‘அவரை பணி நீக்கம் செய்யும் வரையிலும் விடப்போவதில்லை’ என்று மிரட்டுகிறது இந்த காவிக் கும்பல்.

வளர்த்துவிட்ட நச்சுப்பாம்பு தன்னையே கொத்த வருகிறது என்பதை இப்போதேனும் தமிழ் ஊடகங்கள் புரிந்துகொள்ள வேண்டும். தமிழ்நாட்டில் அமைப்பு பலமோ,மக்கள் செல்வாக்கோ துளியும் இல்லாத, வெறும் வாய்ச்சவடால் கும்பலான பாரதிய ஜனதா கட்சியை, எப்போதும் பரபரப்பு செய்தியில் இடம்பெறும் வகையில் பராமரித்தவர்கள் இந்த 24 மணி நேர செய்தித் தொலைக்காட்சிகள்தான். தலைப்புக்கு தொடர்பு இருந்தாலும், இல்லை என்றாலும் பா.ஜ.க. சார்பாக ஒருவரை அழைத்துவந்து விவாத நிகழ்ச்சிகளில் கத்தவிடும் கலாசாரத்தை வளர்த்து எடுத்தவர்கள் இவர்கள்.

தெரிந்தே பொய் சொல்வது, பொய் அம்பலப்படும்போது கூச்சமே இல்லாமல் கூச்சலிடுவது, சரக்கே இல்லாமல் சர்வரோக நிவாரணியாக அனைத்துப் பிரச்னைகளிலும் அடித்துவிடுவது, கேட்ட கேள்விக்கு பதில் சொல்லாமல், ‘நீ மட்டும் யோக்கியமா?’ என திசைதிருப்பல் கேள்விகளில் தந்திரமாக ஒளிந்துகொள்வது… – இவைதான் பா.ஜ.க. ஊடகப் பேச்சாளர்களின் தகுதிகள். இருந்தும் இவர்களை விவாத நிகழ்ச்சிகளுக்கு அழைத்து பாரதிய ஜனதா கட்சி என்ற செத்துப்போன பாம்புக்கு உயிர்த்தண்ணீர் ஊற்றும் வேலையை செய்து வந்தன ஊடகங்கள். இப்போது அந்த பாம்புகள் கொத்த தொடங்கியிருக்கின்றன.

இது கார்த்திகேயன் விவகாரத்தில் தொடங்கவில்லை. ஏற்கெனவே இதே புதிய தலைமுறையில் தீபாவளி தொடர்பான ஒரு விவாதத்திலும் வேண்டும் என்றே சர்ச்சை கிளப்பினார்கள். தாலி தொடர்பான ஒரு விவாதத்தில் புதிய தலைமுறை மீது டிபன்பாக்ஸ் வெடிகுண்டு வீசினார்கள். நியூஸ் 7 விவாதம் ஒன்றில் கலந்துகொண்ட பா.ஜ.க-வை சேர்ந்த எஸ்.வி.சேகர், ’நியூஸ் 7 விவாதங்களுக்கு வே.மதிமாறனை அழைக்கக்கூடாது’ என நியூஸ் 7 உரிமையாளர் வைகுண்டராஜனுக்கே போன் போட்டு பேசினார். அதை வெளிப்படையாக அறிவிக்கவும் செய்தார்.

தினமணியில் வைரமுத்து எழுதிய ஆண்டாள் கட்டுரைக்கு, தமிழக பார்ப்பன கும்பல் தங்கள் இயல்புக்கு பொருந்தாத வகையில் பல போராட்டங்களை நடத்தியது. தமிழ் இதழியல் வரலாற்றிலேயே இல்லாத வகையில், வைரமுத்து எழுதிய கட்டுரையை வெளியிட்டதற்காக தினமணி ஆசிரியர் வைத்தியநாதன் திருவில்லிபுத்தூருக்கே நேரில் சென்று மன்னிப்புக் கேட்டார். திருப்பதி நாராயணன் போன்ற பா.ஜ.க. ஊடகப் பேச்சாளர்கள் ஸ்டுடியோவில் அமர்ந்துகொண்டு சக பங்கேற்பாளர்களையும், நெறியாளரையும் நேரடியாக மிரட்டுவதையும் பார்க்கிறோம். இது ஒரு லைவ் நிகழ்ச்சி; மக்கள் பார்க்கிறார்கள் என்ற அச்சமோ, பதற்றமோ இல்லாமல் இவர்கள் துணிந்து பொய் சொல்கிறார்கள்.

கர்நாடகாவில் கவுரி லங்கேஷையும், எம்.எம்.கல்புர்கியையும், மஹாராஷ்டிராவில் நரேந்திர தபோல்கரையும், கோவிந்த் பன்சாரேவையும் கொலை செய்த மரபு கொண்டவர்கள் இவர்கள். ஊடகங்களில் பா.ஜ.க.வை விமர்சித்தும், அந்தக் கட்சியின் பொய்களை அம்பலப்படுத்தியும், இந்த ஆட்சியின் அவலங்களை தோலுரித்தும் எழுதி வரும்; இயங்கி வரும் பத்திரிகையாளர்கள் மிரட்டப்படுகின்றனர்; கொல்லப்படுகின்றனர். வட இந்தியாவில் நிகழ்ந்துவரும் இந்த கருத்துலக அடாவடியின் மற்றுமொரு வடிவம்தான் இப்போது தமிழ்நாட்டில் நடக்கிறது.

சபரிமலை அய்யப்பன் கோயிலில் பெண்கள் வழிபடுவது தொடர்பான விவாதத்தில்தான் கார்த்திகேயன் அந்த கவிதையை மேற்கோள் காட்டினார். மாதவிடாய் நாட்கள் காரணமாகத்தான் பெண்கள் அனுமதிக்கப்படுவது இல்லை என்றால், பெண் தெய்வங்களை என்ன செய்வீர்கள் என்ற அந்த கேள்வி மிக இயல்பானது; நியாயமானது. இதை பாரதிய ஜனதாவினர் எதிர்க்கும்போது, நியாயமாக, சபரிமலைக்கு பெண்கள் செல்வதை தடுத்து வைத்திருக்கும் இந்து மதத்தின் அடிப்படை விவாதப் பொருளாக மாறியிருக்க வேண்டும். கோயிலின் கருவறைக்குள் சூத்திரர்கள் செல்லக்கூடாது; கோயில் வளாகத்துக்குள் தலித்துகள் செல்லக்கூடாது; கோயில் இருக்கும் பக்கமே பெண்கள் செல்லக்கூடாது என்ற இந்து மதத்தின் இழிவான படிநிலை அமைப்பு பேசப்பட்டிருக்க வேண்டும். மாறாக காவிக்கும்பலின் மிரட்டலுக்கு பதில் சொல்வதாக மற்றவர்களின் பணி சுருங்கிவிட்டது.

இந்த ’தடுப்பாட்ட’ எல்லைக்குள் நம்மை நிறுத்தி வைத்து காவிக்கும்பல் தாக்குதல் ஆட்டத்தை ஆடி வருகிறது. நாம் மீண்டும், மீண்டும் இவர்களுக்கு விளக்கம் சொல்வோராகவும், இவர்களின் பொய்களை அம்பலப்படுத்துவோராகவும் இருந்து வருகிறோம். அவர்கள் நம்மை மூச்சிரைக்க ஓர் இடத்தில் நிறுத்திவிட்டு அடுத்த வதந்தியை ஆற, அமர தயார் செய்கிறார்கள்.

‘கார்த்திகேயனை பணி நீக்கம் செய்ய வேண்டும்’ என்ற இந்த பச்சையான மிரட்டலை புதிய தலைமுறை நிர்வாகம் நேரடியாக எதிர்கொண்டிருக்க வேண்டும். முன் எப்போதும் அப்படி நடைபெறாததைப்போலவே இப்போதும் நடைபெறவில்லை. நெருக்கடியான சந்தர்ப்பங்களில் பத்திரிகையாளர்கள் நிர்வாகங்களால் கைவிடப்படும் தமிழ் இதழியலின் மரபு இப்போதும் தொடர்கிறது. இதன்மூலம், இனிமேல் ’அடக்கி வாசிக்கும்படி’ பத்திரிகையாளர்கள் நேரடியாகவும்; மறைமுகமாகவும் நிர்பந்திக்கப்படுகின்றனர். இந்த அவலமான சூழலில் நிறுவனம் என்ற குடையின் கீழ் அல்ல… பத்திரிகையாளர்கள் என்ற பணியின் பொருட்டு நாம் இணைந்து குரல் கொடுக்க வேண்டும். இந்த எதிர்ப்பு காவிக் கும்பலின் அடாவடிக்காக அல்ல… பத்திரிகையாளர் என்ற வேலையை மனசாட்சியுடன் செய்வதற்கே அவசியமானது.” என தெரிவிக்கப்பட்டுள்ளது.

தலித் என்பதால் மட்டுமே பாஜகவின் ராம்நாத் கோவிந்தை ஆதரிக்க வேண்டுமா ? #ஜனாதிபதிதேர்தல்…

“மநுஸ்மிருதியில் சதுர் வர்ணம் இருக்கிறது. சதுர்வர்ண அமைப்பு முறை மனித இனத்தின் முன்னேற்றத்திற்கு மாபெரும் ஊறு விளைவிக்கக் கூடியது. சூத்திரர்கள் அனைத்து வகையான இழிவான பணிகளைத்தான் செய்ய வேண்டும் என்று மநுஸ்மிருதி கூறுகிறது. அவர்களுக்கு ஏன் கல்வி அளிக்கப்பட வேண்டும்? பார்ப்பனர்கள்தான் கல்வி கற்க வேண்டும். சத்ரியன் ஆயுதங்களை எடுக்க வேண்டும். வைசியர்கள் வணிகம் செய்ய வேண்டும். ஆனால், சூத்திரர்கள் தொண்டூழியம் செய்ய வேண்டும்” – பாபாசாஹேப் டாக்டர் அம்பேத்கர்.

மநுஸ்மிருதியில் என்ன கூறப்பட்டுள்ளதோ அதைத்தான் பாரதீய ஜனதா கட்சி பின்பற்றி வருகிறது. சில இடங்களில் தீவிரமாகவும்; சில நேரங்களில் யார் அறியாமலும். ஜனாதிபதி வேட்பாளார் தேர்விலும் மநுவின் கொள்கைகளின்படியே தொண்டூழியம் செய்வதற்கு ஒரு தலித்தை முன்னிறுத்தி இருக்கிறது என்பதைத்தவிர இதில் ஆச்சர்யப்படவோ சிலாகிக்கவோ எதுவுமில்லை. குஜராத் கலவரத்தின்போது இஸ்லாமியர்களுக்கு எதிராக தலித்துகளையும், ஆதிவாசிகளையுமே கலவரத்தில் ஈடுபடுத்திய வரலாறு அவர்களுக்குண்டு என்பது நாடறிந்த ஒன்று.

தமிழ்நாட்டை தொடர்புபடுத்திக்கூற வேண்டுமென்றால் விநாயகர் சதுர்த்தி ஊர்வலங்களை உதாரணமாக எடுத்துக்கொள்ளலாம்.

கிராமப்புற கோயில்களுக்குள் நுழைய தலித்துகள் அடியும் மிதியும் வாங்கிக்கொண்டிருக்கையில், அதுபற்றி வாயே திறக்காத சங்ப்பரிவாரங்கள், நகர்ப்புறங்களில் தலித் மக்கள் வசிக்கும் பகுதிகளில் விநாயகர் சிலைகளை “காவிக் கொடிகள்” சூழ நிறுவுகிறார்கள். சிவனோ, அம்பாளோ சேரிகளின் வழியாக செல்வதற்கு இன்றைக்கும் தடை இருக்கும் நிலையில், நகர்ப்புற சேரிகளில் விநாயகரை திணித்து உட்கார வைக்கிறார்கள்.

சதுர்த்தியை உருவாக்கிய பார்ப்பனர்கள் தங்கள் வீட்டு புழக்கடையிலோ அல்லது கிணற்றிலோ மஞ்சளில் புள்ளையார் பிடித்து கரைத்து கொண்டிருக்கையில், பத்தடி, இருபதடி, முப்பதடி உயர விநாயகர் சிலைகளை வேனில் ஏற்றிக்கொண்டு இஸ்லாமியர்களின் குடியிருப்புகள் வழியாக ஆக்ரோஷத்துடன் போய்க்கொண்டிருக்கிறார்கள் ஒடுக்கப்பட்ட சாதியை சேர்ந்தவர்கள்.

தலித்துகளும் சிறுபான்மையினமும் இந்து மதத்தினால் ஒடுக்கப்படும் சூழலில், அவர்கள் இருவரையும் எதிர் எதிராக நிற்க வைப்பதில் பாரதீய ஜனதாவும், அதைப் பின்னணியில் இருந்து இயக்கும் சங்ப்பரிவாரங்களும் வெற்றி பெறுகின்றன என்பதே இங்கு கவனத்தில் கொள்ளவேண்டியது.

மட்டுமல்லாமல், தலித்துகளையே இரு பிரிவுகளாக பிரித்து எதிரெதிராக நிற்க வைக்கும் வேலையையும் காவிக்கூடாரங்கள் செவ்வனே செய்துவருகின்றன. எடுத்துக்காட்டாக முகநூலில் புழங்கும், “ஆண்டசாதி” தலித்துகள் சிலரின் பக்கங்களுக்கு சென்றால் அங்கு அம்பேத்கரை இழிவுபடுத்தியும், அவருக்கு நிகராக அல்லது உயர்வாக அயோத்திதாசரை வழிபட்டும் எழுதப்பட்டிருப்பதைப் படிக்கலாம். அயோத்திதாசர் மூலமாக அம்பேத்கரை இழிவுபடுத்த சங்கப்பரிவாரங்கள் செய்யும் முயற்சிகளின் நீட்சியே இவையெல்லாம்.

ஏன் அயோத்திதாசர் என்றால், “தலித்துகளின் அடையாளங்களை இந்து மதம் திருடிக்கொண்டது” என்று குற்றம்சாட்டினாலும் இந்து மதத்தின் கூறுகளை தொடர்ந்து ஆதரிக்கும் ஒருவராகவே அயோத்திதாசர் இருந்திருக்கிறார். ஆனால் அம்பேத்கரோ தன் வாழ்நாள் முழுவதும் இந்து மதத்தை கடுமையாக எதிர்த்து வந்திருக்கிறார். அதனால்தான் “இந்துவாக சாகமாட்டேன்” என்று பவுத்ததிற்கு மாறினார் அவர். அம்பேத்கரின் இந்து மத எதிர்ப்பு கொள்கைகளைப் பற்றிய எந்தவொரு கேள்விக்கும் இதுவரை “இந்துத்துவ அம்பேத்கர்” எழுதிய காவி தலித்துகளாலும் பதில் சொல்ல இயலவில்லை. அதனால்தான் அம்பேத்கரின் கருத்துக்கள் ஆழமாக வேரூன்றி நிற்கும் தமிழகத்தில் அவரை இழிவுபடுத்த அயோத்திதாசரை உபயோகப்படுத்திக்கொள்கிறார்கள் காவிகள். இதற்கு சில தலித்துகளும் உடந்தையாக இருக்கிறார்கள் என்பதை ஒப்புக்கொள்ளத்தான் வேண்டும்.

“வன்கொடுமை தடுப்பு சட்டத்தை நீக்க வேண்டும்… இடஒதுக்கீட்டை ரத்து செய்ய வேண்டும்…சிறுபான்மையினரின் உரிமைகளை பறிக்க வேண்டும்… பெண்களுக்கு உரிமைகள் எதற்கு…” என்றெல்லாம் தொடர்ந்து ஒடுக்கப்பட்டவர்களின் குரல்வளையை நெரிக்கும் பாரதீய ஜனதா சார்பில் ஒரு தலித், இந்திய நாட்டின் ஜனாதிபதியாக பரிந்துரைக்கப்படுகிறார் என்றால் அதில் பெருமைப்படுவதற்கு எதுவும் இல்லை. மாறாக ஒடுக்கப்படும் சமூகம் தாம் மேலும் அவமதிப்பதற்காக உணர்வதற்கே காரணங்கள் நிறைய உண்டு. மாட்டுக்கறி உண்டார்கள் என்பதற்காக, செத்த மாட்டின் தோலை உரித்தார்கள் என்பதற்காக, எந்த மத அடிப்படைவாதத்தின் மூர்க்கத்தால் தலித்துகள் அடித்தே கொல்லப்படுகிறார்களோ அந்த வன்முறையை புனிதப்படுத்தும் ஒரு அமைப்பின் மூலம் அலங்காரப் பதவி ஒன்றுக்கு ஒரு தலித் அறிவிக்கப்படுவதாலாயே அதற்கு நியாயம் வந்துவிடாது.

தற்போது பாஜகவால் அறிவிக்கப்பட்டிருக்கும் ராம்நாத் கோவிந்த்தும் அப்படிப்பட்ட அடிப்படைவாதத்தை தூக்கிப்பிடிக்கும் ஒருவர்தான் என்பதில் ஆச்சர்யம் ஒன்றுமில்லை. அவரைப்பற்றிய செய்திகள் அதைத்தான் சொல்கின்றன.

“சிறுபான்மை மதங்களில் உள்ள பொருளாதார ரீதியாக சமூக ரீதியாக ஒடுக்கப்பட்ட மக்களுக்கு 15 % இட ஒதுக்கீடு வழங்க வலியுறுத்தும் ரங்கநாத் மிஸ்ரா கமிஷன் அறிக்கையை கிழித்துப்போட்ட பெருமை, இந்திய மக்களுக்கு ஜனாதிபதியாக வரவிருக்கும் ராம்நாத் கோவிந்த்துக்கு உண்டு”.

மிக முக்கியமாக காங்கிரஸ் கட்சியின் சார்பில் முன்னிறுத்தப்பட்டு இந்திய ஜனாதிபதியாக பொறுப்பு வகித்த கேஆர்.நாராயணனையும், ராம்நாத் கோவிந்த்தையும் சரிசமமாகப் பார்ப்பது முட்டாள்தனமானது. அம்பேத்கரின் கொள்கைகளை வரித்துக்கொண்டவர் நாராயணன். சாவர்கரின் படத்தைப் பாராளுமன்ற வளாகத்தில் திறந்துவைக்க முடியாது என்று மறுத்தவர் அவர். பின்னாட்களில் அது அப்துல் கலாமால் விமரிசையாகத் திறந்துவைக்கப்பட்டது. நாராயணனால் எப்போதும் பெரியாவாக்கள் முன்னால் மண்டியிட முடியாது. ஆனால் ராம்நாத் கோவிந்த் ஆர்எஸ்எஸ்ஸின் கொள்கைகளை வரித்துக்கொண்டவர். அவர் பெரியாவாக்கள் முன் மண்டியிட்டு அமர்வது மட்டுமல்லாமல், அந்த இடத்தை தண்ணீர் விட்டும் தீட்டு கழித்துவிட்டுப் போக கூடும். ஏனென்றால் ராம்நாத் நம்பும் மநுஸ்மிருதி அவருக்கு அதைத்தான் கடமையாக வலியுறுத்துகிறது.

நீட் தேர்வு, மருத்துவ உயர்கல்வியில் இடஒதுக்கீடு ரத்து, என்று தொடர்ந்து சமூக நீதியின் தலையில் குண்டாந்தடியால் அடித்துக்கொண்டிருக்கும் பாஜகவால், இடஒதுக்கீடை ஒட்டுமொத்தமாக ரத்துசெய்யும் சட்டத்தை ஒரு தலித் ஜனாதிபதி மூலமாகவே அமல்படுத்தவும் இயலும்.  அதற்கான தொண்டூழியராக பணியாற்றத்தான் ராம்நாத் கோவிந்த் தேர்வுசெய்யப்பட்டிருப்பார் என்றே நான் தனிப்பட்டமுறையில் நம்புகிறேன்.

மாட்டுக்கறிக்காக நாடு முழுவதும் தலித்துகள் அடித்துக் கொல்லப்பட்டுக் கொண்டிருக்கையில். அதற்கு எதிர்ப்பு தெரிவித்து அஹமதாபாதில் இருந்து யூனா வரை மாபெரும் எழுச்சி போராட்டம் ஒன்றை தலித்துகள் நடத்திக்காட்டினார்கள். அதில் கலந்துகொண்டதற்காக, தலித்துகளின் பிரச்சனைகளை ஓங்கி உரத்த குரலில் சொல்லியதற்காக “ஜிக்னேஷ் மோத்வானி” என்கிற தலித் இளைஞனை தொடர்ந்து கடும் நெருக்கடிகளுக்கு ஆளாக்கி கொண்டிருக்கும் பாஜகதான், ஆர்எஸ்எஸ் அமைப்பின் தொண்டூழிய தலித்தை ஜனாதிபதி ஆக்குகிறது என்பது எத்தனை முரண்பாடாக இருக்கிறது அல்லவா ?

 

கட்டுரையாளர்; தலித் செயற்பாட்டாளர்.