ஆரிய எதிர்ப்பு நூலே திருக்குறள்: கி. வீரமணி

திருவள்ளுவருக்கு காவி உடை அணிவித்தும், நெற்றியில் பட்டை தீட்டியும், கழுத்தில் உருத் திராட்சை போட்டும் காவி மயமாக்கிய கூட்டத்தின் முகத்திரையைக் கிழிக்க இதுவே சரியான சந்தர்ப்பம் – தமிழ் உணர்வாளர்களே வீறுகொள்வீர் என திராவிடர் கழகத் தலைவர்  கி.வீரமணி விடுத்துள்ள அறிக்கை:

புரட்சியாளர் டாக்டர் அம்பேத்கருக்குக் காவி வண்ணம் பூசி, ஏதோ அவர்பால் மிகுந்த அன்பும், பாசமும் கொண்டதுபோல் பா.ஜ.க. சில காலமாக நாடகமாடி வருகிறது.

இதைவிட மகா கேவலமான இழிசெயல் வேறு உண்டா?

அதேபோல, தேசப்பிதா காந்தியாருக்கு 150 ஆவது விழாவென அவரையும் கபளீகரம் செய்து, கோட்சே என்ற மராத்தி சித்பவன் பார்ப்பனர் சுட்டுக் கொன்றார் என்ற வரலாற்றுச் சுவடுகளையே அழித்துவிட்டு, காந்தியாரின் அருந்தவப் புதல்வர்கள் போல, ஓநாய் சைவமான கோலம் போல – நாடகம் ஒன்றை நடத்தி வருகின்றனர்.

காந்தியாருக்கு விழா – காந்தியாரை சுட்டுக் கொன்ற வழக்கில் சிக்கிய பிறகு, பிறழ்சாட்சி, மற்ற சில காணாமற்போன ஆவணங்கள் போன்றவை யாலோ, வேறு எப்படியோ விடுதலை பெற்ற, பிரிட்டிஷ் அரசிடம், பலமுறை மன்னிப்புக் கடிதம் எழுதி, வெளியே வந்த ‘‘வீர” சவார்க்கருக்கு ‘பாரத ரத்னா’ விருது அறிவிப்பு, இப்படி பலவிதமான வித்தைகள் மேல் வித்தைகள்.

ஆட்டைக் கடித்து மாட்டைக் கடித்து கடைசியில் மனிதனைக் கடித்த கதைபோல இப்பொழுது சங் பரிவார்க் கும்பல் உலக தத்துவ ஞானியான திருவள்ளுவரையே காவிக்குள் கொண்டு வர முயற்சிக்கின்றன.

தமிழ்நாட்டை வளைத்திட இப்பொழுது ஒரு புதிய யுக்திதான் திருவள்ளுவரை காவிமயமாக்குவதாகும். திருக்குறளிலிருந்து கடவுள் வாழ்த்து என்பதை எடுத்துக் கூறி, தி.க.வுக்கும், தி.மு.க.வுக்கும் சவால் விடுகிறார்கள்.

பி.ஜே.பி.யின் சமூக வலைதளத்திலும்….

பி.ஜே.பி.யின் சமூக வலைதளத்தில் திருவள்ளு வருக்கு காவி உடை அணிவித்து, நெற்றியில் பட்டை யும் போட்டு, உருத்திராட்சத்தையும் அணிவித்து – திருவள்ளுவரை இதற்குமேல் எந்த அளவும் கொச்சைப்படுத்த முடியாது என்னும் அளவுக்குத் தங்களின் பார்ப்பனீய மோசடிக் குணத்தை வெளிச்சம் போட்டுக் காட்டிவிட்டனர்.

கவுதமப் புத்தரையே மகாவிஷ்ணுவின் அவதாரம் ஆக்கியவர்கள்!

கவுதமப் புத்தரையே மகாவிஷ்ணுவின் அவதாரம் என்று சொன்னவர்கள் அல்லவா!

ஒன்றை ஒழிக்க முடியாவிட்டால், ஆலிங்கனம் செய்து அழிப்பது, ஊடுருவுவது, திரிபுவாதம் செய் வது என்பதெல்லாம் பார்ப்பனீயத்திற்கே உரித்தான ‘கல்யாண திருக்குணங்களாகும்.’

மழித்தலும், நீட்டலும் வேண்டாம் என்று சொன்ன திருவள்ளுவரையே இந்துத்துவா சாயம் தீட்டி தங்களின் அற்பத்தனத்தை வெளிப்படுத்திவிட்டனர்.

‘‘அகர முதல எழுத்தெல்லாம்” எனும் குறளுக்கு அவாள் கூறும் விளக்கம்!

அகர முதல எழுத்தெல்லாம் ஆதி

பகவன் முதற்றே உலகு

என்ற குறளுக்கு பி.ஜே.பி. கூறும் விளக்கம் என்ன தெரியுமா?

எழுத்துக்கள் எல்லாம் அகரத்தை அடிப்படையாகக் கொண்டிருக்கின்றன. அதுபோல, உலகம் கடவுளை அடிப்படையாகக் கொண்டிருக்கிறது என்று வியாக்கியானம் செய்துள்ளது பி.ஜே.பி.

குறளில் கடவுள், மதம், கோவில், ஜாதி, ஆத்மா என்ற சொற்கள் உண்டா?

அட ‘பிரகஸ்பதிகளே!’ திருக்குறளில் ‘கடவுள், மதம், ஜாதி, கோவில், ஆத்மா’ என்ற சொற்களே கிடையாது என்பது உங்களுக்குத் தெரியுமா?

இந்த சொற்கள் எல்லாம் திருவள்ளுவருக்குத் தெரியாது – அதனால்தான் கையாளவில்லை என்று சொல்லப் போகிறீர்களா?

உண்மை என்ன வென்றால், இவற்றையெல்லாம் புறந்தள்ளி – ஆரியத்தின் – பிறப்பில் பேதம் விளைவிக்கும் வருணாசிரமத்தின் ஆணிவேரை வெட்டி வீழ்த்தும் வகையில் ‘‘பிறப்பொக்கும் எல்லா உயிர்க்கும்” என்று கூறி ஆரியத்தின் பிடரியில் பெருந்தாக்குதலைத் தொடுத்தவர் திருவள்ளுவர்.

10 குறட்பாக்களுக்கு தலைமைத்துவ பண்பு நலன்கள் வகைகளே தவிர, பக்திக்கானது அல்ல என்று ஆராய்ச்சியோடு கூறியதை,

புரட்சிக்கவிஞர் பாரதிதாசன், இராவண காவியப் புகழ் புலவர் குழந்தை, நாவலர் இரா.நெடுஞ்செழியன் போன்றோரின் திருக்குறள் விளக்கவுரையிலே குறிப்பிட்டுள்ளார்களே!

வ.உ.சி. எழுதிய திருக்குறள் உரையில் கடவுள் வாழ்த்தே திருவள்ளுவர் எழுதியதில்லை; இடைச் செருகல் என்றே கடவுள் நம்பிக்கையாளரான (கப்பலோட்டிய தமிழன் வ.உ.சி.) எழுதியுள்ளாரே!

ஆரிய எதிர்ப்பு நூலே திருக்குறள்

திருக்குறள் என்பது அய்யப்பாட்டுக்கு சற்றும் இடமில்லாத ஆரியத்துக்கு எதிரான கோட்பாடுகளைக் கொண்ட சமூக சமத்துவ நூலாகும். அறம் பொருள், இன்பம்பற்றி எழுதிய திருவள்ளுவர் வீடுபற்றி எழுதாததிலிருந்தே அவரின் உள்ளம் எந்த உள்ளம் என்பது வெளிப்படை.

தமக்கு எதிரான கருத்தினைக் கூறும் வள்ளுவரை அவமானப்படுத்துவது என்பது ஒன்று – இன்னொரு வகையில் உட்கிரகித்து அழிப்பது என்பது இவர்களின் தந்திரமாகும்.

.வே.சு. அய்யர் என்ன எழுதினார்?

‘சேரன்மாதேவி’ புகழ் வ.வே.சு. அய்யர் திருக்குறளின் முதல் குறளான

அகர முதல எழுத்தெல்லாம் ஆதி

பகவன் முதற்றே உலகு

என்பதற்கு எழுதிய விளக்கம் என்ன தெரியுமா?

‘‘திருவள்ளுவரின் தந்தையார் பகவன் என்ற பார்ப்பனராவார். இவரது தாயார் ஆதி என்ற பறைச்சி. ஆதியை இன்னொரு பார்ப்பனர் அழைத்து வந்து பகவனுக்கு மணமுடித்து வைத்தார்” என்று குறிப்பிட்டுள்ளார்.

(The Kural or The Maxims of Thiruvalluvar 1916).

மறைந்த காஞ்சி சங்கராச்சாரியார் சந்திரசேக ரேந்திர சரஸ்வதி என்பவர் ஆண்டாளின் ‘தீக்குறளை சென்றோதோம்’ என்ற வரிக்கு ‘‘தீய திருக்குறளை ஓதமாட்டோம்” என்று சொன்னாரே!

நாகசாமிகளின் விஷமம்!

மனுதர்மத்தின் சாரம் திருக்குறள் என்று அண் மையில் நாகசாமி என்ற பார்ப்பனர் ஆங்கிலத்தில் நூல் ஒன்றை வெளியிட்டபோது, அதனைக் கண்டித் தும், மறுத்தும் சென்னை பெரியார் திடலில் சிறப்புக் கூட்டம் ஒன்றை நடத்தினோமே! (7.11.2018).

பயிர்த் தொழிலைப் பாவத் தொழில் என்று சொன்ன மனுதர்மம் எங்கே? (அத்தியாயம் 10, சுலோகம் 84).

உழுதுண்டு வாழ்வாரே வாழ்வார் என்று சொன்ன திருவள்ளுவர் எங்கே?

தாய்லாந்தில் திருக்குறள் பெருமை பேசும் பிரதமர்

இந்த இலட்சணத்தில் தாய்லாந்து மொழியில் மொழி பெயர்க்கப்பட்ட திருக்குறள் நூலை இந்தியப் பிரதமர் நரேந்திர மோடி வெளியிட்டு, திருக் குறளைப்பற்றிப் புகழ்ந்து தள்ளியுள்ளார்.

இரட்டை வேடமும், ஊடுருவி அழிக்கும் தந்திரமும் இந்த சங் பரிவார்களுக்குக் கைவந்த கலையே!

ஆனாலும், தமிழ்நாடு ஏமாந்துவிடாது – வேட்டிக் கட்டினாலும், வீதியிலே சிரசாசனம் போட்டாலும் இந்தப் பெரியார் பூமி ஒருபோதும் ஏமாந்துவிடாது. முன்பு ஒரு எம்.பி.யைக் கொண்டு வந்து முன் னோட்டம் விட்டு மூக்கறுபட்ட பிறகுமா இப்படிப்பட்ட ஏமாற்று யுக்திகள்?

திருவள்ளுவர்மீது சாணி வீச்சு!

இந்த செய்திகள் வெளிவந்து கொண்டிருக்கும் இதே காலகட்டத்தில், தஞ்சை பிள்ளையார்ப்பட்டியில் உள்ள திருவள்ளுவர் சிலையின்மீது குறிப்பாக முகத்தில் சாணியை வீசியுள்ளனர் என்று செய்தி வெளிவந்துள்ளது.

சங் பரிவார் முகத்திரையைக் கிழிக்க இதுவே சரியான சந்தர்ப்பம்

பாரதீய ஜனதா, சங் பரிவார் என்பது தமிழுக்கும், தமிழர்களுக்கும், தமிழ்ப் பண்பாட்டுக்கும் எதிரானது என்று திராவிடர் கழகம் தொடர்ந்து கூறி வந் திருக்கிறது – வருகிறது. இவையெல்லாம் நூற்றுக்கு நூறு உண்மை – உண்மையிலும் உண்மை என்பதை கண்கூடாகத் தெரிந்துகொள்வதற்கு இவற்றைவிட வேறு ஆதாரங்கள் தேவையா?

மதச்சார்பற்ற சக்திகளும், தமிழ் உணர்வாளர் களும் இந்த சந்தர்ப்பத்தை மிகச் சரியாகப் பயன்படுத்திக் கொண்டு பி.ஜே.பி. – சங் பரிவார்க் கூட்டத்தின் முகத்திரையைக் கிழித்தெறிய முன்வர வேண்டியது புத்திசாலித்தனமாகும்.

பி.ஜே.பி.யில் உள்ள தமிழர்களே, சிந்திப்பீர்!

பி.ஜே.பி. – சங்பரிவார்க்குள் இருக்கும் தமிழர் களே இதற்கு மேலும் இந்த அமைப்புகளில் இருப்பது குறித்து சிந்திப்பீர்களாக!

“தலைச்சிறந்த புரட்சியாளர்; இந்திய தேசியத்தின் ஒளிவிளக்கு”: சாவர்க்கரின் நினைவு நாளில் மத்திய அமைச்சர் புகழாரம்!

சாவர்க்கரின் 50-வது நினைவு நாள் கடைப்பிடிக்கப்படுவதை ஒட்டி மத்திய பெட்ரோலிய துறை அமைச்சர் தர்மேந்திர பிரதான், அவரை “தலைச்சிறந்த புரட்சியாளர்; இந்திய தேசியத்தின் ஒளிவிளக்கு” என புகழ்ந்திருக்கிறார்.

சாவர்க்கர் உண்மையில் புரட்சியாளரா? அவருடைய புரட்சி எப்படிப்பட்டது? அவர் எப்படி இந்திய தேசியத்தின் ஒளிவிளக்கு ஆனார்? சாவர்க்கர் பற்றிய சிறு துளியை மார்க்சிஸ்ட் க. கனகராஜ் விவரிக்கிறார்…

“சுதந்திரப் போராட்டத்தின் போது ஆர்.எஸ்.எஸ்.சின் தலைவராக இருந்த கோல்வால்கர் (குருஜிதான்) ஒரு நாள், ஒரு பொழுது, ஒரு நிமிடம் கூட தப்பித் தவறிக் கூட கனவிலும் சுதந்திரப் போராட்டத்தில் ஈடுபட்டதும் கிடையாது; ஈடுபட்டவர்களை வாழ்த்திப் பேசியதும் கிடையாது, இன்னும் சொல்லப்போனால் ஒரு பேச்சுக்காகக் கூட ஆங்கிலேயர்களை விமர்சித்ததும் கூட கிடையாது. தங்களில் யாராவது ஒருவரை சுதந்திரப் போராட்ட வீரராகக் காட்டிக் கொள்ள வேண்டும் என்பதற்காக வாஜ்பாய் சுதந்திரப் போராட்டத்தில் ஈடுபட்டதாகச் சொல்லி, அதை பத்திரிகைகள் விசாரிக்கும்போது அது உண்மையல்ல, மாறாக, போராட்டத்தில் ஈடுபட்டவர்கள் யார் என்பதை சொல்லிவிட்டு அவர் வெளியே வந்துவிட்டார் என்கிற விஷயம் வெளியே வந்து, அவர்கள் அவமானப்பட்டு நின்றார்கள்.

சாவர்க்கர் பெரிய சாகசம் செய்து விட்டதாகவும், அதன் காரணமாகவே அவர் ‘வீர’ சாவர்க்கர் என்றழைக்கப்பட்டதாகவும் அவ்வப்போது அவர்கள் சொல்வதுண்டு. அவர் இங்கிலாந்தில் இருக்கும்போது ஆங்கில அரசாங்கத்திற்கு எதிராக பேசினார், எழுதினார் என்பதெல்லாம் உண்மை. ஆனால் அவர் அந்தமான் சிறையில் அடைக்கப்பட்ட பிறகு மன்னிப்புக் கடிதங்களை மட்டுமே எழுதிக் கொண்டிருந்தார். இன்னும் சொல்லப்போனால், கருணை மனு எப்படியெல்லாம் எழுத முடியும் என்பதற்கு இன்றுவரையிலும் ‘சிறந்த உதாரணமாய்’ திகழ்வது ‘வீர’சாவர்க்கர் ஆங்கில அரசாங்கத்திற்கு எழுதிய கடிதங்கள்தான்.

அவர்களைப் பற்றி மற்றவர்கள் என்ன எழுதினார்கள் என்பதை விட அவர்களுடைய ஆவணங்களில் அவர்கள் சுதந்திரப் போராட்டம் குறித்து என்ன எழுதியிருக்கிறார்கள் என்பதை தில்லி பல்கலைக்கழகத்தின் முன்னாள் பேராசிரியர் ஷம்சுல் இஸ்லாம், வரிக்கு வரி ஆய்வு செய்து எழுதியிருக்கிறார். இதோ அந்த விபரங்கள்:அவர்களது ஆவணங்களில் உள்ளபடி அவர்களின் எழுத்துக்களில்….

  1. ஆங்கிலேயர்களை விமர்சித்து எழுதியது – ஜீரோ
  2. ஆங்கிலேய ஆட்சியாளர்களைப் போற்றிப் புகழ்ந்து எழுதியது – 16 முறை
  3. ஆங்கிலேய எதிர்ப்புச் சின்னமான வந்தே மாதரம் பாடியது – ஜீரோ
  4. விடுதலைப் போராட்டத்தை அவதூறு செய்து எழுதியது – 16 முறை
  5. விடுதலைப் போராட்டத்தைப் பாராட்டி எழுதியது – ஜீரோ
  6. ஆங்கிலேயர்கள் இந்தியாவை விட்டுச் செல்ல வேண்டுமென எழுதியது – ஜீரோ
  7. ஜாலியன் வாலாபாக், ககோரி குண்டு வழக்கு, கதார் இயக்கம் போன்ற சுதந்திரப் போராட்ட முக்கிய நிகழ்ச்சிகள் பற்றிய குறிப்பு – ஜீரோ
  8. ஆங்கிலேய ஆட்சிக்கு எதிராக தங்களின் உயிரை அர்ப்பணித்தவர்களைப் பாராட்டி எழுதியது – ஜீரோ
  9. தியாகிகளின் தியாகத்தை கேவலப்படுத்தி எழுதியது – 10 முறை
  10. சுதேசியைப் பாராட்டிய குறிப்புகள் – ஜீரோ-இப்படி அடுக்கிக் கொண்டே போக முடியும்.

அவர்கள் விடுதலைப் போராட்டத்தை, விடுதலைப் போராட்டத்தில் ஈடுபட்டவர்களை ஆதரித்தவர்கள் கிடையாது. அதைச் சிறுமைப்படுத்தியவர்கள். அதைச் சீர்குலைக்க முனைந்தவர்கள். இப்போது அதிகார பீடம் அவர்களுக்கு வாய்த்திருப்பதால் தேச பக்தி பற்றிப் பேசுகிறார்கள். தேச விடுதலை இயக்கத்தில் இருந்தவர்களை அப்போது அவமானப்படுத்தினார்கள். இப்போது தேச விரோதிகள் என்கிறார்கள்”.

 

பீகார் முதலமைச்சராக பொறுப்பேற்ற நிதிஷ்குமாருக்கு ஜவாஹிருல்லா வாழ்த்து

 பீகாரின் முதலமைச்சராக பதவி ஏற்ற நிதிஷ்குமார் அவர்களுக்கு மனிதநேய மக்கள் கட்சியின் தலைவர்  எம். எச். ஜவாஹிருல்லா  வாழ்த்துக் கடிதத்தை அனுப்பியுள்ளார். அதில்,
“பீகாரில் மதவெறியைத் தூண்டி சமூக நீதியை அழிக்க முயன்றவர்களுக்கு எதிராக மாபெரும் கூட்டணி அமைத்து வெற்றிப்பெற்று வெள்ளிக்கிழமை மீண்டும் பீகார் மாநில முதலமைச்சராகப் பொறுப்பேற்கும் உங்களுக்கு மனிதநேய மக்கள் கட்சி சார்பாக எனது மனமார்ந்த வாழ்த்துகளைத் தெரிவித்துக் கொள்கிறேன்.
தங்கள் தலைமையிலான மாபெரும் கூட்டணி பெற்ற வெற்றி இந்தியாவின் சகிப்புத்தன்மையை யாராலும் சீர்குலைக்க முடியாது என்பதற்கு சிறந்த எடுத்துக்காட்டாகும். இந்தியாவின் பன்முகத்தன்மை என்றைக்கும் பாதுகாப்பாக இருக்கும் என்று இந்த வெற்றி உணர்த்துகின்றது. இந்தியாவின் மதசார்பின்மைக்கு கிடைத்த வெற்றியின் காரணமாக பிளவு சக்திகள் துவண்டு போயுள்ளனர். காந்தி, நேரு, அபுல்கலாம் ஆசாத், ராம்மனோகர் லோகியா மற்றும் ஜெயபிரகாஷ் நாராயணன் போன்றவர்களின் லட்சியமே இந்தியாவை வழிநடத்தும்.
ஜவாஹிருல்லா
ஜவாஹிருல்லா
ஷியாமா பிரசாத் முகர்ஜி, கோல்வால்கர், சவார்க்கர்,  நாதுராம் கோட்சே போன்றவர்கள் இந்தியாவின் வழிகாட்டிகளாக என்றைக்கும் அங்கீகரிக்கப் படமாட்டார்கள் என்பதையும் இந்த வெற்றி உணர்த்துகின்றது. இந்தியாவின் வளர்ச்சியில் நேருவின் பங்களிப்பை கிண்டல் செய்தவர்கள் இப்போது நேருவின் செல்வாக்கை உணர்ந்து இருப்பார்கள். வளர்ச்சி என்கின்ற பெயரில் வன்மத்தை கட்டவிழ்த்து விட்ட கூட்டத்தின் கூடாரத்தை இந்த வெற்றி காலி செய்துவிட்டது. இந்தியர்களின் தனி மனித உரிமையை இந்த வெற்றி உறுதிப் படுத்தியுள்ளது. இந்தியர்களின் உணவு உரிமை, பேச்சுரிமை  மற்றும் கருத்து உரிமை உங்கள் கூட்டணி பெற்ற வெற்றி மூலம் காப்பாற்றப்பட்டுள்ளது.
வரலாறு போற்றும் இந்த வெற்றியை சாத்தியமாக்கி இன்று மீண்டும் பீகார் முதலமைச்சராக பொறுப்பேற்கும் உங்களை மீண்டும் மனமார வாழ்த்துகிறேன். உங்கள் ஆட்சியின் கீழ் தொடர்ந்து பீகாரில் சமூக நல்லிணக்கமும், சமூக நீதியும் தழைத்தோங்கவும் வளர்ச்சியின் பாதையில் தொடர்ந்து பீகார் முன்னேறவும் இறைவனைப் பிரார்த்திக்கிறேன்.” இவ்வாறு அக்கடிதத்தில் குறிப்பிடப்பட்டுள்ளது.