“குடியுரிமை திருத்தச் சட்டத்தால் வங்கதேச இந்துக்கள் தாக்கப்படுவார்கள்”

ஏஐடியுசி அசாம் மாநிலக் குழுவின் பொதுச் செயலாளர் தோழர். ரமென்தாஸ் (Ramen Das) தனது மனைவியின் மருத்துவ ஆலோசனைக்காக சென்னை வந்திருந்தார். அசாமின் வளங்கள், அசாம் ஒப்பந்தம், தேசிய குடியுரிமை பதிவேடு, குடியுரிமை திருத்தச் சட்டம் என பல்வேறு பொருள் குறித்து பீட்டர் துரைராஜுடன் பேசுகிறார்.

கேள்வி: நீங்கள் எப்படி ஏஐடியுசி அரங்கத்திற்கு வந்தீர்கள்?

பதில்: கௌகாத்தி பல்கலைக்கழகத்தில் பிஎஸ்சி, படித்தேன். முதலில் அனைத்திந்திய மாணவர் பெருமன்றத்திலும், பின்பு இளைஞர் பெருமன்றத்தி்லும் பணியாற்றினேன். அப்போது இருந்த தலைவர்கள் என்னை தொழிற்சங்க அரங்கத்தில் பணியாற்றச் சொன்னார்கள். மறைந்த திபங்கர் தத்தா எனக்கு குரு. 1992 ஆம் ஆண்டு முதல் எண்ணெய் அரங்கத்திலும், பிறகு அமைப்புச் சாரா அரங்கத்திலும் பணியாற்றி னேன். இப்போது ஏஐடியுசி மாநில பொதுச் செயலாளராக இருக்கிறேன். 1994 ஆம் ஆண்டு இந்திய கம்யூனிஸ்ட் கட்சியின் உறுப்பினரானேன். இப்போது கட்சியின் மாநில செயற்குழு உறுப்பினராகவும் இருக்கிறேன்.

ரெமன்தாஸ்

கே: அசாம் மாநிலத்தின் சிறப்பு பற்றி சொல்லுங்களேன்?

ப: அசாம் மாநிலத்தில் நான்கு எண்ணெய் சுத்திகரிப்பு நிலையங்கள் உள்ளன. இங்கு இருக்கும் வாயு சுத்திகரிப்பு நிலையம் (gas based refinery)ஆசியாவிலேயே இரண்டாவது பெரிய ஆலையாகும். இங்கு நீர்வளம் அதிகம். இந்தியாவின் நீளமான நதியான பிரம்மபுத்திரா இங்கு ஓடுகிறது. இதிலிருந்து நீர்மின்சாரம் உற்பத்தி ஆகிறது. வடகிழக்கு மாநிலங்களுக்குத் தேவையான 80 சத மின்சாரத்தை அசாம் உற்பத்தி செய்கிறது. உலக அளவில் புகழ்பெற்ற, இயற்கையான காடுகள் அசாம் மாநிலத்தில் உள்ளன. இதிலிருந்து மரச் சாமான்கள் உற்பத்தி செய்யப்படுகின்றன.

இரும்புத்தாது, நிலக்கரி போன்ற கனிம வளங்கள் அதிக அளவில் அசாமில் கிடைக்கிறது. இப்போது இந்தியாவில் முதன்முதலாக, அசாமில் உயிரி சுத்திகரிப்பு நிலையம் (Bio refinery) நிர்மாணிக்கும் பணி நடந்து கொண்டிருக்கிறது. இதன் மூலம் மூங்கிலில் இருந்து எரிபொருள்(எதனால்) உற்பத்தி ஆகும். இது வாகனங்ளுக்கு எரிபொருளாக பயன்படும்.இதனால் அந்நியச் செலாவணி மிச்சமாகும். இயற்கை வளங்கள், கனிம வளங்கள் அசாமில் அதிக அளவு கிடைத்தாலும் இம் மாநிலத்தை மத்தியில் ஆட்சி செய்த அரசுகள் கண்டு கொள்ளவில்லை. அது காங்கிரஸ் அரசாக இருந்தாலும் சரி, இப்போது உள்ள பாஜக அரசாக இருந்தாலும் சரி.

கே: மத்திய அரசு என்ன செய்ய வேண்டும் என்று சொல்லுகிறீர்கள் ?

ப: நிறைய தொழிற்சாலைகளை அசாமில் நிறுவ வேண்டும் என்று கோரி வருகிறோம். ஏற்கனவே இருக்கும் ஆலைகளை மேலும் விரிவாக்கம் செய்ய வேண்டும். இந்த ஆலைகளில் உள்ளூரில் உள்ள அசாம் மக்களுக்கு வேலைவாய்ப்பு கிடைக்க வேண்டும். வேலையற்ற அசாம் இளைஞர்களின் எண்ணிக்கை நாளுக்கு நாள் பெருகிக் கொண்டே இருக்கிறது. இங்கிருந்து எடுத்துச் செல்லப்படும் இயற்கை வளங்களுக்கு உண்மையான பங்குத்தொகை (royalty) தர வேண்டும். அசாம் மக்கள் படிப்பறிவு இல்லாமல் இருக்கிறார்கள்; உதிரியாக இருக்கிறார்கள்; அவர்களை மத்திய அரசு வஞ்சித்து வருகிறது.

கே: தேசிய குடியுரிமை பதிவேடு பற்றி… ?

ப: 1979 முதல் 1983 வரை அசாம் மாணவர்களும்,இளைஞர்களும் வரலாற்றுச் சிறப்பு மிக்க போராட்டத்தை நடத்தினார்கள். இதனை காங்கிரஸ் அரசு மூர்க்கமாக எதிர் கொண்டது. இந்தப் போராட்டங்களில் 855 பேர் துப்பாக்கிச் சூட்டிற்கு பலியானார்கள். இதன் தொடர்ச்சியாக 1985 ஆம் ஆண்டு ராஜீவ் காந்தி கையெழுத்து இட்ட ‘அசாம் ஒப்பந்தம்’ உருவானது. அசாம் மாநிலத்தில் குடியிருக்கும் வெளிநாட்டினரை பற்றி இந்த ஒப்பந்தம் பேசுகிறது.

இந்த ஒப்பந்தத்தின்படி 25.3.1971 ஆம் நாளை கணக்கிடும் நாளாகக் (cut of date) கொண்டு அதற்கு பின்பு அசாமில் குடியேறியவர்களை வெளியேற்றுவது என்று முடிவெடுக்கப்பட்டது. இதற்காகதேசிய மக்கள் தொகை பதிவேட்டை உருவாக்குவது எனவும் முடிவெடுக்கப்பட்டது.

அந்த ஒப்பந்தம் அசாம் மக்களின் தனித்தன்மை, கலாச்சாரம், வன உரிமைகளை பாதுகாக்க உறுதியளித்தது.

ஆனால் 2005 ஆம் ஆண்டு வரை தேசிய மக்கள் தொகை பதிவேட்டிற்கான பணி தொடங்கப்படவில்லை. பிறகு இதற்கான பூர்வாங்க வேலைகளை காங்கிரஸ் அரசு செய்தது. 2012 ஆம் ஆண்டிற்குப் பிறகு உச்சநீதிமன்றத்தின் நேரடியான வழிகாட்டுதலின் கீழ் தேசிய மக்கள் பதிவேட்டிற்காண பணிகள் முழு வீச்சில் நடந்தன; தேசிய குடிமக்கள் மசோதா தாயாரானது.

அதன்படி 2019 செப்டம்பர் மாதம், 40 இலட்சம் பேர் உரிய ஆவணங்கள் இல்லாமல் அசாமில் இருப்பது கண்டறியப்பட்டது. அதன் பிறகு அவர்கள் தொடர்பு அலுவலரிடம் (nodal officer) முறையிட்ட பின்பு 19 இலட்சம் பேர் அத்துமீறி இருப்பதாக கணக்கிடப்பட்டுள்ளது. அவர்கள் உச்ச நீதிமன்றத்தால் நியமிக்கப்பட்ட வெளிநாட்டினருக்கான தீர்ப்பாயத்திடம் (foreigners tribunal) முறையீடு செய்ய வேண்டும் என்று இருக்கும் போதுதான் இப்போது பாஜக அரசு தற்போதய தேசிய குடியுரிமை திருத்தச் சட்டத்தை கொண்டுவந்துள்ளது.

அசாமில் நடந்துவரும் போராட்டம்…

கே: தேசிய குடியுரிமை திருத்தச் சட்டம் அசாமியர்களுக்கு என்ன பாதிப்பை கொண்டு வரும் என்று நினைக்கிறீர்ரகள் ?

ப: இந்தச் சட்டம் அசாம் ஒப்பந்தத்திற்கு விரோதமானது. அசாம் ஒப்பந்தம் 25.3.1971 க்கு முன்பு குடிபெயர்ந்தவர்களுக்கு குடியுரிமை வழங்குகிறது. ஆனால் இப்போது பாஜக கொண்டு வந்துள்ள சட்டப்படி கணக்கிடும் தேதியானது 31.12.2014 ஆக மாற்றப்பட்டுள்ளது. இதனால் வங்க தேசத்தில் இருந்து, மேற்கு வங்காளத்தில் இருந்து அசாமில் குடியேறும் இந்துக்களின் எண்ணிக்கை கணிசமாக உயரும். அசாமியர்கள் தங்கள் சொந்த மாநிலத்திலேயே சிறுபான்மையினராக மாற்றப்பட்டு விடுவோம் என அஞ்சுகின்றனர். தங்கள் அடையாளம் பறிபோகும்; தங்கள் வேலைவாய்ப்பு பறிபோகும்; அலுவல் மொழியாக வங்காளம் மாறிவிடும் என்று நினைக்கிறார்கள். எனவே இராணுவத்தை எதிர்த்து நிற்கிறார்கள். அவர்களின் போராட்டம் நூறு சதம் நியாயமானது. இதுவரை இரண்டு பேர் துப்பாக்கிச் சூட்டிற்கு பலியாகி உள்ளனர்.

கே: இந்த போராட்டத்தை ஏஐடியுசி எப்படி பார்க்கிறது ?

ப: இந்திய கம்யூனிஸ்ட் கட்சி பிரச்சினையை தெளிவாக புரிந்து கொண்டுள்ளது. கணக்கிடும் தேதியாக 25.3.1971 ஐ கட்சி கொடுத்த ஆலோசனையைத்தான் பாராளுமன்றம் ஏற்றுக்கொண்டு உள்ளது. நமது ஏஐடியுசி தோழர்களும்,கட்சி தோழர்களும் போராட்டத்தில் முன்னணியில் இருக்கிறார்கள். மத்திய அரசு இந்தச் சட்டத்தை கைவிட வேண்டும்.இது அரசிலமைப்புச் சட்டத்திற்கு எதிரானது. மதரீதியில் மக்களை பிளவுபடுத்தக் கூடியது.

இப்போது உரிய ஆவணம் இல்லாமல் இருக்கும் 19 இலட்சம் பேரில் 12 இலட்சம் பேர் இந்துக்கள். கணக்கிடும் தேதியை மாற்றி 12 இலட்சம் இந்துக்களுக்கு குடியுரிமை கொடுப்பதன் மூலம் அவர்களை அப்படியே தங்களின் வாக்கு வங்கியாக மாற்றிக் கொள்ளமுடியும் என பாஜக நம்புகிறது. அசாம் மக்களின் உணர்வுகளை அது புரிந்து கொள்ள தயாராக இல்லை. குரூரமாக (cruel) நடந்துகொள்கிறது.

கே: இதனால் என்ன விளைவுகள் ஏற்படும் ?

ப: வங்க தேசத்தில் இப்போது இந்துக்கள் நல்ல நிலமையில் இருக்கின்றனர். அங்குள்ள அரசாங்கத்தில் மூன்று, நான்கு பேர் அமைச்சர்களாக உள்ளனர். உள்ளாட்சி அமைப்புகளில் பெருமளவில் இந்துக்கள் வெற்றி பெற்றுள்ளனர். வியாபாரத்தில் முன்னிலையில் உள்ளனர். அங்குள்ள அவாமி லீக் கட்சியைச் சார்ந்த ஷேக் ஹசீனாவின் அரசு மதச் சார்பற்ற அரசாக உள்ளது. ஆனால் இந்த சட்டம் வந்த பிறகு வங்க தேசத்தில் உள்ள இஸ்லாமிய மத அடிப்படைவாதிகள் அங்குள்ள இந்துக்களுக்கு எதிராக இந்த சட்டத்தை சொல்லி பிரச்சாரம் செய்து அவர்களை இந்தியாவிற்கு துரத்தி விடுவார்கள். முஸ்லிம் மத அடிப்படைவாதிகள் வங்க தேசத்தில் இனி வரும் தேர்தலில் இந்துக்களுக்கு எதிராக பிரச்சாரம் செய்து ஆட்சிக்கு வரவும் வாய்ப்பு உள்ளது. இந்தச் சட்டம் வங்க தேசத்தில் உள்ள இந்துக்கள் மீது தாக்குதல் நடத்தும் வாய்ப்பை உருவாக்கி உள்ளது.

வங்க தேச இந்துக்கள்…

பாஜக மிகப் பெரிய தவறு இழைத்துள்ளது. வடகிழக்கு மாநிலங்களில் இப்போதுதான் தீவிரவாதம் குறைந்து அமைதி திரும்பி உள்ளது. இந்தச் சட்டத்திற்கு பிறகு அங்கு மீண்டும் தீவிரவாதம் மோலோங்கும்.

கே: அசாம் மாநிலத்தில் ஏஐடியுசி எப்படி இருக்கிறது ?

ப: அசாமில் ஏஐடியுசி ஒரு முக்கியமான பாத்திரத்தை வகிக்கிறது. எண்ணெய், மின்சாரம், நிலக்கரி, அமைப்புச் சாரா துறைகளில் நமது சங்கம் நன்கு செயல்படுகிறது. தொழிலாளர் துறை அதிகாரிகள் நம்மை மதிக்கிறார்கள். ஏஐடியுசியில் இரண்டு இலட்சம் பேர் உறுப்பினர்களாக உள்ளனர்.புதிய சங்கங்கள் வருகின்றன. நமது போராட்டம், தொடர்ச்சியான செயல்பாடுகளினால் சமீப காலங்களில் உறுப்பினர் எண்ணிக்கை அதிகரித்து உள்ளது.

இப்போது உள்ள பாஜக அரசு பாரத் பெட்ரோலியம் (BPCL) நிறுவனத்தை தனியாருக்கு கொடுக்க முடிவெடுத்துள்ளது. இந்த நிறுவனம் 30,000 கோடி ரூபாய்களை அரசுக்கு ஈவுத்தொகையாகவும், வரியாகவும் தருகிறது. இதை தனியாருக்கு விற்பனை செய்தால் அதன் துணை நிறுவனமான(subsidiary), NRL(Numaligarh Refinery Limited) என்ற எண்ணெய் நிறுவனமும் தனியார் வசம் போய்விடும். அசாம் ஒப்பந்தத்தினால் உருவான இரண்டு எண்ணெய் நிறுவனங்களில் NRL-ம் ஒன்று. இதனை ஏஐடியுசி எதிர்த்துப் போராடி வருகிறது.

வடகிழக்கு மாநிலங்களுக்கு 80 சத மின்சாரத்தை தரும் NEEPCO (North East Electric Power Corporation) என்ற நிறுவனத்தை தனியாருக்கு விற்பனை செய்ய பாஜக முனைந்துள்ளது. பட்ஜெட்டில் ஏற்பட்டுள்ள பற்றாக்குறையை போக்க இது போன்ற லாபம் தரும் நிறுவனங்களை விற்கிறது.

இத்தகைய கொள்கைகளை எதிர்த்து அகில இந்திய அளவில் நடைபெற உள்ள ஜனவரி 8 ம் வேலைநிறுத்தத்தை வெற்றி பெறச் செய்வோம். முழு கடையடைப்பாக மாற்றுவோம்.

நன்றி: ஜனசக்தி டிசம்பர் 22-28, 2019.

மங்களூருவில் போலீசு துப்பாக்கிச் சூட்டில் போராட்டக்காரர்கள் இருவர் பலி: உறுதி செய்தது போலீசு

குடியுரிமை திருத்த சட்டத்துக்கு எதிர்ப்பு தெரிவித்து மங்களூருவில் நடந்த போராட்டத்தை ஒடுக்க நடத்தப்பட்ட துப்பாக்கிச்சூட்டில் இரண்டு போராட்டக்காரர்கள் பலியாகியுள்ளனர். இதை மங்களூரு போலீசு உறுதி செய்துள்ளது.

போராட்டங்களை அடுத்து மங்களூருவில் ஊரடங்கு உத்தரவு அமலாக்கப்பட்டிருந்தது. இந்நிலையில் கூடியிருந்த போராட்டக்காரர்களை களைக்க போலீசார் முதலில் தடியடி நடத்தியதாகவும், பின்னர் போராட்டக்காரர்கள் கல்வீச்சில் ஈடுபட்டதாகவும் ஊடக செய்திகள் தெரிவிக்கின்றன. கல்வீச்சு சம்பவங்களை தடுக்க துப்பாக்குச் சூடு நடத்தப்பட்டதாகவும் அதில் இருவர் பலியானதாகவும் போலீசு தரப்பு கூறுகிறது.

இந்த பலிக்கு பாஜகவினர் உண்டாக்கிய அசாத்திய சூழலே காரணம் என முன்னாள் எம்.எல்.ஏ. தினேஷ் குண்டு ராவ் தெரிவித்துள்ளார்.

“திரு. மோடி…என் ஆடையால் என்னை அடையாளம் காண முடியுமா?”

டிசம்பர் 15-ஆம் தேதி, ஜார்க்கண்டில் நடந்த பேரணியில் உரையாற்றிய பிரதமர் நரேந்திர மோடி, “கலவரக்காரர்களை அவர்களின் ஆடைகளால் அடையாளம் காண முடியும்” என்று கூறினார். குடியுரிமை திருத்தச் சட்டம் பாரபட்சமானது இசுலாமியர்களுக்கு எதிரானது என இந்தியாவின் பல்வேறு பகுதிகளில் எதிர்ப்புக்கள் வெடித்த நேரத்தில் மோடியின் பேச்சு அதை உறுதி செய்யும்வகையில் இருந்தது.

நான்கு நாட்களுக்குப் பிறகு, சுமார் ஆயிரத்துக்கும் அதிகமான மாணவர்கள் கொச்சியில் போராட்டம் நடத்தியபோது. ஒரு இளம்பெண் பிடித்திருந்த பதாகை அனைவரின் கவனத்தையும் கவர்ந்தது. 18 வயது நிரம்பிய அந்தப் பெண் கருப்பு புர்கா மற்றும் ஊதா நிற ஹிஜாப் அணிந்து, முழக்கங்களை எழுப்பிக்கொண்டிருந்தார். அவர் கையில் இருந்த பதாகையில், “மிஸ்டர் மோடி, நான் இந்தூலேகா. என் ஆடையால் என்னை அடையாளம் காண முடியுமா?” என எழுதப்பட்டிருந்தது.

இந்துலேகா பார்த்தன் என்ற அந்த இளம்பெண்ணின் படம் வைரலாகிக்கொண்டிருக்கிறது. முசுலீம் அல்லாத ஒரு முசுலீமைப் போல உடைந்து பிரிவினையாளர்களுக்கு பாடம் புகட்டியிருப்பதை பலரும் பாராட்டியுள்ளனர். ஒரு முஸ்லீமாக உடையணிந்துள்ளனர். “நம்முடைய பிரதமருக்கு என்னுடைய கருத்தைச் சொல்ல இதுவே சிறந்த வழி என நான் நினைத்தேன். அவர் சொன்னதை நான் எதிர்க்கிறேன் என்று அவரிடம் சென்று சொல்ல முடியாது” என இந்தியன் எக்ஸ்பிரசுக்கு அளித்த பேட்டியில் இந்துலேகா கூறுகிறார்.

இந்துலேகா

“ஆனால் நான் ஒருபோதும் அவதூறான அல்லது இழிவான எதையும் சொல்லவில்லை, நான் சொல்வது சரி என்று எனக்குத் தெரியும்” என காவி ட்ரோல்களின் தாக்குதலுக்கு பதில் சொல்லியிருக்கிறார் இந்துலேகா.

எந்த அரசியல் கட்சியிலும் உறுப்பினராக இல்லை என்று கூறும் அவர், “எனக்கென தெளிவான அரசியல் சிந்தனை உள்ளது. இருப்பினும், எனக்கு அரசியல் கட்சிகளைப் பிடிக்கவில்லை. ஆகவே, போராட்டம் எந்த அரசியல் கட்சியினாலும் ஏற்பாடு செய்யப்படவில்லை என்று கேள்விப்பட்டபோது, நான் பங்கேற்க நினைத்தேன்” என்கிறார்.

தேசிய குடிமக்கள் பதிவேடு, குடியுரிமை திருத்த சட்டத்தை ஏன் எதிர்க்கிறார் என்பதையும் இந்தூலேகா கூறுகிறார். “இவை இரண்டும் ஒன்றோடொன்று இணைக்கப்பட்டுள்ளன. தற்போதைய சிஏஏ திருத்தம் மற்ற அனைத்து திருத்தங்களையும் செல்லாததாக்குகிறது. நீங்கள் ஒரு மதத்தை முழுவதுமாக விலக்க முடியாது. இது இந்துத்துவாவுடன் நாம் எவ்வாறு முன்னகர்ந்து கொண்டிகிறோம் என்பதையே காட்டுகிறது” என்றும் அவர் தெளிவாகக் கூறுகிறார்.

பாகிஸ்தானில் இருந்து வரக்கூடிய முசுலீம்களுக்காகத்தான் போராடுகிறார்கள்: மாலன்

குடியுரிமை திருத்த சட்டத்தை எதிர்த்து இந்தியாவில் நடக்கும் போராட்டங்கள், ‘பாகிஸ்தானிலிருந்து வரக்கூடிய முசுலீம்களுக்காகத்தான் என பத்திரிகையாளரும் மோடி அரசின் ஆதரவாளருமான மாலன் தெரிவித்துள்ளார்.

நாடு முழுவதும் கிளர்ந்தெழுந்த போராட்டங்கள் குறித்து புதிய தலைமுறை தொலைக்காட்சியில் விவாதம் நடந்தது. இந்த விவாதத்தில் கலந்துகொண்ட மாலன், ‘இந்தியாவில் இருக்கும் முசுலீம்களுக்கு பிரச்சினை இல்லை. எதிர்கால சந்ததியினருக்கும் பிரச்சினை இல்லை. பாகிஸ்தானில் இருந்துவரக்கூடிய இசுலாமியார்களுக்குத்தான் இந்தப் போராட்டங்கள் நடத்தப்படுகின்றன. காங்கிரஸ் கட்சி இவங்களுக்கு ஏன் குடியுரிமை கொடுக்கவில்லை என்றுதான் போராடுகிறது’ என்றார் அவர்.

அலிகர் முசுலீம் பல்கலைக்கழக மாணவர் கவுதம் நக்கீரன் ஊடகத்துக்கு அளித்துள்ள பேட்டியில், மாலன் உள்ளிட்டவர்களின் அவதூறுக்கு பதிலளித்துள்ளார்.

இவர்களின் வாழ்தலுக்கான போராட்டத்தை வேடிக்கை மட்டும் பார்க்க வேண்டுமா?

சிவபாலன் இளங்கோவன்

ஒட்டுமொத்த மாணவர்களின் போராட்டத்தின் முகமாக இருக்கும் அந்த பர்தா அணிந்த, கண்ணாடிபோட்ட பெண்ணிடம் பத்திரிக்கையாளர் “எதற்காக இந்த போராட்டம்” என கேட்கும்போது, அந்த பெண் ஒரே வார்த்தை தான் அதற்கு பதிலாய் சொல்கிறாள் “For existence”. இதை சொல்லும்போது அவள் அத்தனை பதட்டமாக இருக்கிறாள். அவளது கரங்களை இறுக்கமாக பற்றிக்கொண்டு ‘பயப்பட வேண்டாம்’ என சொல்ல வேண்டும் போல் இருக்கிறது. ஆனால் பயப்பட வேண்டாமா?

“survival” ஐ தவிர மனிதனுக்கு வேறு என்ன தலையாக பிரச்சினை இந்த உலகத்தில் இருக்கிறது? அந்த survival கேள்விக்குறியாகும்போது அது எத்தனை பதட்டமானதாக, அச்சமூட்டக்கூடியதாக இருக்கும்?. அவர்களுக்காக இறங்கி போராடவில்லையென்றாலும், அவர்களுக்காக எதுவும் பேசவில்லையென்றாலும் கூட, அவர்களின் நிலையை புரிந்து கொள்வது தானே சக மனிதராக நமது முதன்மையான கடமை?, நாளை எல்லோருக்குமே இப்படிப்பட்ட existence பிரச்சினை வரும்போது இந்த சமூகம் நம்முடன் நிற்க வேண்டுமென்று தானே நாமும் எதிர்பார்ப்போம்?

அடிப்படை மனித பண்புகளை விட, நமது அடிப்படைவாத அடையாளங்கள் அத்தனை உயர்வானதா? மனித பண்புகளை உதறிவிட்டு அப்படி என்ன அடையாள பெருமையை நாம் தூக்கி சுமக்க போகிறோம்? என்னை பொறுத்த வரையில் அரசாங்க வன்முறை கூட அத்தனை அச்சமூட்டிவதாக இல்லை. ஒரு பெரும்பான்மையான சமூகம் அரசாங்கத்தின் இந்த வன்முறையை இப்படி கண்ணை மூடிக்கொண்டு ஆதரிக்கிறதே அது தான் அச்சமூட்டக்கூடியதாக இருக்கிறது.

இந்த காலத்தில் எப்படி மக்கள் இப்படி மாறிப்போய்விட்டார்கள்? உண்மையில் சக மனிதர்களின் மீதான எந்த வித கரிசனமும் இல்லாத, மனிதாபிமானமும் இல்லாத பெரும்பான்மையான மக்களின் மன நிலையை தான் அரசு பிரதிபலிக்கிறதோ என்று நினைக்க தூண்டுகிறது. உண்மையில் அது தான் என்னை நடுங்க வைக்கிறது.

சிறு வயதில் பள்ளி புத்தகங்களின் முதல் பக்கத்தில் அச்சிடப்பட்டிருக்கும் வேற்றுமையில் ஒற்றுமை (Unity in diversity) என்ற சொல்லை பார்க்கும்போதெல்லாம் அது எத்தனை பொருள் பொதிந்த சொல் என்று உணர்ந்ததேயில்லை. ஆனால் இப்போது புரிகிறது ‘வேற்றுமையில் ஒற்றுமை’ என்பது மாபெரும் கனவு. அது எப்படியாவது நனவாக வேண்டும் என்பதை தவிர வேறெதுவும் தோன்றவில்லை.

சிவபாலன் இளங்கோவன், மருத்துவர்; எழுத்தாளர்.