நூல் அறிமுகம்: சைபர் சிம்மன் எழுதிய ‘மொபைல் ஜர்னலிசம்’

பீட்டர் துரைராஜ்

தொழில்நுட்பம் குறித்தும், இணையம் குறித்தும் தொடர்ந்து பத்திரிக்கைகளிலும், தனது வலைப்பக்கத்திலும் எழுதி வரும் சைபர்சிம்மன். ‘மொபைல் ஜர்னலிசம்’ என்ற நூலை எழுதியுள்ளார்.அவர் ஏற்கனவே எழுதியுள்ள நான்கு நூட்களும் இணையம், தொழில்நுட்பம் தொடர்பானவையே.

நேர்த்தியோடு வெளிவந்துள்ள இந்த நூலை நான் போகிற போக்கில் படித்துவிட்டேன். எளிய சொற்கள், சின்னஞ்சிறு வாக்கியங்களில் மொபைல் ஜர்னலிசம் குறித்த ஒரு பருந்துப் பார்வையை இந்த நூல் தருகிறது. இது குறித்து மேலும் தெரிந்து கொள்ள விரும்புவர்களுக்கு நூலாசிரியர் தான் எடுத்தாண்ட மூலநூட்கள், இணைய பக்கங்களின் சுட்டிகள் போன்றவற்றை இணைப்பாக கொடுத்துள்ளார். இந்த நூலை ஒரு பார்வைநூலாக (reference book) கருதிக் கொள்ளலாம்.

செல்போன், ஸ்மார்ட் போன், ஐ போன் போன்ற கையடக்க சாதனங்கள் ஊடகத்துறையில் எப்படி இயல்பாக பயன்படுத்தப்படுகின்றன; அவை எப்போது முதல் பயன்படுத்தப்பட்டன, அதற்கான தேவை என்ன என்பதை விளக்குவது மூலம் மொபைல் ஜர்னலிசத்தின் வரலாற்றுத் தொடர்ச்சியை அழகாக சொல்லுகிறார் நூலாசிரியர். சைபர் சிம்மன் என்கிற நரசிம்மன் இலோயோலா கல்லூரியில் பயிலும் இதழியல் மாணவர்களுக்கு வகுப்பு எடுப்பவர். எனவே ஒவ்வொரு அத்தியாயமும் ஒரு அமர்வுக்கு தேவைப்படும் உரைபோல பாந்தமாக இருக்கிறது. ஆசிரியர் என்பதால் சொல்லக்கூடிய தகவல்களும் புதிதாக, சரியானதாக இருக்கலாம். இது ‘மொபைல் ஜர்னலிசம்’ குறித்து தமிழில் வெளிவந்துள்ள முதல் நூல்.

“இதழியலை மக்கள் நலன், மாற்றத்திற்கான வழியாகக் கருதி, அந்த நம்பிக்கையுடனும், ஊக்கத்துடனும் செயல்பட்ட மறைந்த பத்திரிக்கையாளரும், நண்பருமான (எம். யு. ஜே. தலைவர்) மோகன் நினைவுகளுக்கு” இந்த நூலை சமர்ப்பணம் செய்துள்ளார் சைபர் சிம்மன். அதனால்தானோ என்னவோ அவர் சொல்லும் உதாரணங்களும் மக்களை முதன்மைப்படுத்தியே உள்ளன. சிரியாவில் வெடித்த உள்நாட்டுப் போரின் போது கெடுபிடிகளுக்கு இடையில் ‘அகதிகள் வலியை உணரவைத்த’ ஜெர்மானியின் இளம் நிருபரான பால் ராம்சைமர் (Paul Ronzheimer); சதீஷ்கர் மாநிலத்தில் ‘சிஜிநெட் ஸ்வரா’ என்ற ‘ஆதிவாசிகளுக்காக செல்போன் வானொலி’ நடத்தும் சவுத்திரி போன்றோர் நன்கு சித்தரிக்கப்பட்டுள்ளனர்.

‘மொபைல் ஜர்னலிசம்’ – ‘செல்பேசி இதழியல்’ ஆங்கிலத்தில் மோஜோ என்றே பிரபலமாகக் குறிப்பிடப்படுகிறது என்று சொல்கிறது இந்த நூல். 2005 ம் ஆண்டு அமெரிக்காவின் ‘தி நியூஸ் பிரஸ்’ என்ற நாளிதழால் மோஜோ என்னும் வார்த்தை பயன்படுத்தப்பட்டது என்கிறார் சைபர்சிம்மன். மோஜோ’ – மொபைல் ஜர்னலிசம், மோஜா வரலாறு, மோஜோ அடிப்படைகள், மோஜோ நுணுக்கங்கள், மோஜோ செயலிகள் – சாதனங்கள் என்ற அத்தியாயங்களில் 37 தலைப்புகள் உள்ளன. ஒவ்வொரு தலைப்பும் மூன்று, நான்கு பக்கங்களில் எழுதப்பட்டுள்ளன. மொபைல் போனை வைத்துக் கொண்டு என்ன செய்யலாம், அதன் சாத்தியங்கள், இத்துறையில் இதுவரை நடந்துள்ள மாற்றங்கள் என்னவென்பதை ஒரு தொகுப்பாக இந்த நூல் நமக்கு காட்டுகிறது.

ஒரு செய்தியை வெளியிடத் தீர்மானிக்கும்போது பொதுநலனே அதற்கு ஆதார அம்சமாக உள்ளது. அதேபோல ஒரு செய்தியை வெளியிடாமல் இருக்கத் தீர்மானித்தாலும் ‘பொதுநலனே அதற்கான காரணமாக அமைகிறது’ என்று ‘செல்பேசி இதழுக்கான அறம்’ அத்தியாயத்தில் கூறுகிறார். ‘எப்படியும் இணையத்தில் வெளியாகும் வாய்ப்பிருப்பது என்பது அறம் மீறிய செய்திகளை வெளியிடுவதற்கான நியாயமாகாது’ என்றும் கூறுகிறார்.

‘1776 ல் நிகழ்ந்த அமெரிக்க பிரகடனம் பிரிட்டனில் உள்ள மக்களுக்கு தெரிய 48 நாட்கள் ஆனது’. ஆனால் இப்போது உடனுக்குடன் செய்திகள் தெரிய வருகின்றன. எனவே நவீன தொழில்நுட்பங்களை ஊடகங்கள் உடனுக்குடன் கைகொள்வது அவசியமாகிறது. சைபர் சிம்மன் சொல்லுவது போல இது ஒரு ‘நவீன இதழியல் கையேடுதான்’. இதற்கு முன்பாக இருந்த வி.ஜெ.(வீடியோ ஜர்னலிசம்) பற்றியும் இந்த நூலில் சொல்லப்படுகிறது. குறுஞ்செய்தி மூலமாக செய்தி அனுப்பிய சம்பவங்களும் உண்டு.

காமிராவை எப்படி பிடிக்க வேண்டும், வெளிச்சம் எங்கிருந்து விழவேண்டும், படக்காட்சி எப்படி இருக்க வேண்டும், இப்போது இருக்கும் செயலிகள் யாவை என்பது போன்ற தொழில்நுட்ப விபரங்களையும் இந்த நூலில் விளக்குகிறார். இதனைப் பயன்படுத்துபவர்களுக்கு இக்குறிப்புகள் பயனுள்ளவையாக இருக்கும். உடனடிச் செய்திகளை எப்படி சொல்லுவது, கதை சொல்லுவதன் அடிப்படைகள் எத்தகையது என்பதையும் சொல்லுகிறார். மனித குல வரலாறு கதைகள் மூலம்தான் பரப்பப்டுகிறது, எனவே சம்பவங்களை கதையாகச் சொல்ல வேண்டும் என்பது இவரது கருத்தாகும்.

மொத்தத்தில் இந்த நூல் இத்துறையில் முக்கியமான நூல்; முதல் நூல். பத்திரிக்கையாளர்களுக்கு இதிலிருந்து பயனுள்ள குறிப்புகள் கிடைக்கலாம். பொதுமக்கள் இதிலிருந்து பல அடிப்படைகளை புரிந்து கொள்ள முடியும். வித்தியாசமான முயற்சி. கிட்டத்தட்ட ஒரு பாடநூல் போல உள்ளது. ‘இதழியல் என்பதே ஒரு குறிப்பிட்ட நோக்கோடு கதை சொல்லுதல்’ என்று சொல்லும் சைபர்சிம்மன் ‘இதழாளர்களைப் பொறுத்த வரையில் கதைதான் எல்லாமும்’ என்கிறார்.

‘மொபைல் ஜர்னலிசம்’, கிழக்கு பதிப்பகம்/216 பக்கங்கள்/செப்டம்பர் 2019/ரூ.225

தொழிற்சங்க செயல்பாட்டாளரான பீட்டர் துரைராஜ், பல்துறை சார்ந்த செயல்பாட்டாளர்களின் நேர்காணல்கள், நூல் அறிமுகம் ஆகியவற்றை எழுதிவருகிறார்.

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s

This site uses Akismet to reduce spam. Learn how your comment data is processed.