இந்தியாவின் தேசியம் கோமியத்தில் இருக்கிறது!

சரவணன் சந்திரன்

சரவணன் சந்திரன்

இந்திய அரசு மாட்டைக் கட்டிக் கொண்டு அலைகிறது. பக்கத்தில் சீனாவில் நடப்பதென்ன? பொருள் தயாரிப்புத் துறையில் சீனாவை நம்மால் மிஞ்சவே முடியாது. சீனப் பொருட்கள் என மூக்கைச் சுளிக்கிறோம். ஆனால் நாம் பயன்படுத்துவது சீனா பொருளைத்தான் என்பதே தெரியாமல் இரண்டற ஆல்ரெடி கலந்து விட்டது.

இந்த நெகடிவ் என்பதெல்லாம் இந்திய தேசிய மனநிலை. அதைத் தவறாகவும் சொல்லவில்லை. ஆனால் கள யதார்த்தத்தைப் புறக்கணிக்க முடியாதில்லையா? அங்கேயும் நல்ல வியாபாரம் உண்டு. நேர்மையிலும் தொழில் ஒழுக்கத்திலும் சீனர்களை அடித்துக் கொள்ள முடியாது என்பதை என் தனிப்பட்ட அனுபவத்தில் சொல்கிறேன். இந்தியர்கள் பத்து தவறு செய்தால், சீனர்கள் மூணு செய்வார்கள். சீனர்களோடு நம்பிக்கையாய் வியாபாரம் செய்யலாம். இதையெல்லாம் இங்கே சொல்ல மாட்டார்கள்.

ரெம்ப நாளாக பூச்சாண்டி போலக் காட்டிக் கொண்டிருக்கிறார்கள். ஐந்து முதலைகளின் கதை நாவலில் விரிவாக சீனர்களின் வணிக முயற்சிகள் பற்றி எழுதியிருக்கிறேன். இந்தியர்கள்தான் வணிகத்தில் நேர்மையைத் தொலையக் கொடுத்து வருகிறோம். வெளியே போய் வந்தவர்களிடம் கேளுங்கள். விவரமாகச் சொல்வார்கள்.

யீவு என்றுதான் நினைக்கிறேன். அது அங்கே திண்டுக்கல் மாதிரி பெரிய கிராமம். அந்த ஊரைச் சேர்ந்த நண்பன் ஒருத்தன் இருந்தான். அவன் கதை கதையாய்ச் சொல்லியிருக்கிறான்.

அந்தக் கிராமத்தில் குண்டூசி துவங்கி சகலமும் மொத்தத் தயாரிப்பு. இங்கே பூஜையறையில் உள்ள பிள்ளையார்கள் அங்கே கோடிக் கணக்கில் கொட்டிக் கிடப்பார்கள். உலகத்திற்கே கொசு அடிக்கிற பேட் அங்கிருந்துதான் போகிறது. போய் ஆர்டரை கொடுத்து விட்டு வந்தால் பக்காவாக இங்கே அனுப்பி விடுவார்கள். சுத்தமான வியாபாரம். இங்கே சிறு வியாபாரிகளின் பிழைப்பு இதை வைத்துத்தான் ஓடுகிறது.

பெரிய நிறுவனங்கள்தான் தேசபக்தி என்று பின்னே ஒளிந்து கொண்டு கதறுகின்றன. ரயிலில் சைனா போனுக்கான சைனா கவர்கள் விற்பது பலரின் பிழைப்பாகவும் இருக்கிறது. துல்லியமாகத் தாக்கி விட்டது சீனா. சீனாவுடன் போட்டி போடச் சொன்னால், இவர்கள் சண்டை போட்டுக் கொண்டிருக்கிறார்கள். தேசபக்தி விநாயகரே அங்கேதான் மொத்தமாகத் தயாரிக்கப்படுகிறார் என்கிற விவரம் புரியாமல் இங்கே சீனப் பொருட்களை வாங்காதீர்கள் என காமெடி பண்ணிக் கொண்டிருக்கிறார்கள்.

வியாபாரத்தை ஒரு காலத்தில் பாவமாக நினைத்த சீனா இப்போது அதையே ஆயுதமாக கையிலெடுக்கிறது. இந்தியா இந்த நேரத்தில் நோட்டை மாற்றி தேவையில்லாத, ராங்கான பொருளாதர ஆட்டத்தை ஆடிக் கொண்டிருக்கிறது. சீனர்கள் நகம் கடித்துக் கொண்டிருப்பார்கள். அவர்களுடைய பொருளாதரமும் பாதிக்கும்.

ஆனாலும் அசரடிக்கிறார்கள் பாருங்கள். அவர்கள்தான் உண்மையில் தேசமாகத் திரண்டிருக்கிறார்கள். அவர்களின் தேசியம் உழைப்பில் இருக்கிறது. இங்கே கோமியத்தில் இருக்கிறது. விரைவில் அதையும் பாட்டிலாக சைனாக்காரனே அனுப்பினாலும் ஆச்சரியப்படுவதற்கில்லை.

சரவணன் சந்திரன் எழுத்தாளர்; அரசியல் விமர்சகர். ரோலக்ஸ் வாட்ச்,  ஐந்து முதலைகளின் கதை நாவல்களின் ஆசிரியர்.  சமீபத்தில் வெளியான நாவல் ‘அஜ்வா’.