கரூர் கிராமத்தில் தொடரும் தீண்டாமை: பள்ளிகளில், டீ கடைகளில் இரட்டை டம்ளர் முறை; புத்தாண்டு வாழ்த்து தெரிவித்த தலித் இளைஞருக்கு அடி!

புத்தாண்டு கொண்டாடிய தலித் இளைஞர் மீது சாதிஆதிக்கச் சக்தியினர் தாக்குதல் நடத்தியுள்ளனர். புகார் அளித்தும் குற்றவாளிகளை கைது செய்யாமல் அலட்சியமாக காவல்துறையினர் உள்ளதாக தீக்கதிர் செய்தி வெளியிட்டுள்ளது.

கரூர் மாவட்டம், ராயனூர்அடுத்துள்ள கோடங்கிப்பட்டியைச் சேர்ந்தவர் முருகன். இவர் மார்க்சிஸ்ட் கம்யூனிஸ்ட் கட்சியின் முன்னாள் கரூர் நகரக்குழு உறுப்பினர் ஆவார். இவர் தலித் சமூகத்தை சேர்ந்தவர். இவரது மகன் கேசவன். இவர் இந்திய ஜனநாயக வாலிபர் சங்கத்தின் கோடங்கிபட்டி கிளை துணைத் தலைவராக உள்ளார். புத்தாண்டு தினத்தை வரவேற்கும் விதமாக அன்று இரவு நண்பர்களுடன் கோடங்கிபட்டியில் புத்தாண்டை கொண்டாடினார். பின்னர் தனது உறவினர்கள் பொன்னுசாமி, கார்த்திக் ஆகியோருடன் சொந்த ஊரான சின்னமநாயக்கன்பட்டிக்கு இருசக்கர வாகனத்தில் சென்றுள்ளார். அப்போது சின்னமநாயக்கன்பட்டி பேருந்துநிறுத்தம் அருகே  ஆதிக்க சாதி இளைஞர்கள் புத்தாண்டை கொண்டாடிவிட்டு சாலையில் நின்றுள்ளனர். இளைஞர்களை பார்த்த ஆர்வத்தில் கேசவன், அவர்களுக்கு புத்தாண்டு தின வாழ்த்துக்களை தெரிவித்துள்ளார்.

இதனை பொறுத்துக்கொள்ள முடியாத சாதி ஆதிக்கச் சக்தியினரான இளைஞர்கள் கேசவனை சாதியின் பெயரை கூறி,தகாதவார்த்தைகளால் திட்டி, மூன்று பேர் மீதும் கொலைவெறி தாக்குதல் நடத்தியுள்ளனர். இதில் படுகாயமடைந்த கேசவன் மற்றும் அவரது உறவினர்களை, அங்குள்ள தலித் மக்கள் மீட்டு சிகிச்சைக்காக கரூர் அரசு தலைமை மருத்துவமனையில் சேர்த்தனர். இந்த சம்பவம் குறித்து வெள்ளியணை காவல்துறையினர் வழக்குப் பதிவு செய்தும், இதுவரைகுற்றவாளிகளை கைதுசெய்யவில்லை.

சின்னமநாயக்கன்பட்டியில் உள்ள சாதி ஆதிக்கச்சக்தியினர் கடந்த காலங்களில்அங்குள்ள தலித் மக்கள் மீதுகடுமையான தீண்டாமைக்கொடுமைகளை மேற்கொள்கின்றனர். இதற்கு மாவட்ட ஆட்சியர், மாவட்ட காவல் கண்காணிப்பாளர் ஆகியோர் நிரந்தரமான தீர்வுகள் எதுவும் எடுக்கவில்லை என்பது குறிப்பிடத்தக்கது.

இதுகுறித்து மார்க்சிஸ்ட் கம்யூனிஸ்ட் கட்சியின் கரூர் நகரச் செயலாளர் எம்.ஜோதிபாசு கூறியதாவது, சின்னமநாயக்கன்பட்டி கிராமத்தில் சுமார் 120 தலித் குடும்பங்கள் உள்ளன. நூற்றுக்கும் மேற்பட்ட சாதி ஆதிக்கச் சக்தியினரை சேர்ந்த குடும்பங்கள் உள்ளன. இங்குள்ள தலித் மக்களுக்கு தொடர்ந்து பல்வேறு வடிவங்களில் தீண்டாமை கொடுமைகளை சாதி ஆதிக்கச் சாதியினர் செய்து வருகின்றனர். சின்னமநாயக்கன்பட்டியில் அங்கன்வாடி, அரசு தொடக்கப்பள்ளி செயல்பட்டு வருகிறது. இப்பள்ளியில் பயிலும் மாணவ, மாணவிகள், குழந்தைகளுக்கு இரட்டை டம்ளர், இரட்டை தட்டு, வகுப்பறைகளில் தலித் குழந்தைகளுக்கு தனியிடம், தலித் குழந்தைகள் பள்ளியில் உள்ள குடிநீர் குழாயில் தண்ணீர் பிடித்து குடிக்க முடியாது.

சாதி ஆதிக்கச் சக்தியினர் குழாயில் தண்ணீர் பிடித்து டம்ளரில் ஊற்றினால் மட்டுமே தலித் குழந்தைகள் தண்ணீர் குடிக்க முடியும். தமிழக அரசால் கட்டிக்கொடுக்கப்பட்டுள்ள சமுதாயக்கூடம், பொதுக்கழிப்பறைகள் உள்ளன. ஆனால் இவற்றை தலித் மக்கள் பயன்படுத்த அனுமதியில்லை. இதனால் பெண்கள், குழந்தைகள் என அனைவரும் திறந்தவெளியை பயன்படுத்தும் அவலநிலையே உள்ளது. டீ கடைகளில் இரட்டை டம்ளர் முறை, இருக்கைகளில் அமரக்கூடாது, சாதி ஆதிக்கச் சக்தியினர் பயன்படுத்தும் குழாய்களில் குடிநீர் பிடிக்கக் கூடாது,பேருந்துகளில் சாதி ஆதிக்கச் சக்தியினருடன் சேர்ந்து அமரக்கூடாது.

சாலைகளில் செருப்பு அணிந்து செல்லக்கூடாது என்பன உள்ளிட்ட பல்வேறு தீண்டாமை கொடுமைகளை சாதிஆதிக்கச் சக்தியினர் தலித் மக்கள் மீது தொடுத்து வருகின்றனர். இப்பகுதியில் நிலவும் தீண்டாமைக்கொடுமைகள் மீது கடுமையான நடவடிக்கையை மாவட்ட நிர்வாகம், காவல்துறை நிர்வாகம் எடுத்திருந்தால், தலித் இளைஞர்கள் மீது கொலைவெறி தாக்குதல்களை சாதி ஆதிக்கச் சக்தியினர் நடத்தியிருக்கமாட்டார்கள். தீண்டாமையின் உச்சம்தான் இந்த தாக்குதலுக்கு காரணமாகும். தாக்குதலில் ஈடுபட்டுள்ள சாதி ஆதிக்கச் சக்தியினரை உடனடியாக கைது செய்வதுடன் அவர்கள் மீது கடுமையான நடவடிக்கை எடுக்க வேண்டும். சின்னமநாயக்கன்பட்டி மற்றும் கோடங்கிபட்டி பகுதி தலித் மக்களின் உயிருக்கும், உடமைகளுக்கும் மாவட்ட நிர்வாகம் உரிய பாதுகாப்பு வழங்க வேண்டும். தீண்டாமைக் கொடுமைகளுக்கு மாவட்ட நிர்வாகமும், காவல்துறையும் நிரந்தர தீர்வு ஏற்படுத்திட வேண்டும்.

இதுகுறித்து நடவடிக்கை எடுத்து, கோரிக்கைகளை நிறைவேற்றாவிட்டால் அப்பகுதி பொதுமக்களையும், ஜனநாயக அமைப்புகளையும் ஒன்றுதிரட்டி மார்க்சிஸ்ட் கம்யூனிஸ்ட் கட்சி போராட்டங்களில் ஈடுபடும் என்றார்.

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s

This site uses Akismet to reduce spam. Learn how your comment data is processed.